Recentemente chegado ao Instituto “Nosa Señora dos Ollos Grandes” como profesor de Filosofía (1983) atopeime coa grata sorpresa dun “Seminario permanente de Filosofía”, que entón organizaba Manuel Regueiro Tenreiro. O seu labor constante fixo deste seminario un referente de prestixio para todos os profesores de filosofía e outros interesados, non só no ámbito de Lugo senón noutras partes de Galicia.
Baixo a dirección de profesores altamente especializados nos temas elixidos, como Gustavo Bueno, Gómez Caffarena, Sergio Rábade, Javier Monserrat... Profundizabamos no coñecemento dos grandes autores e temas da filosofía: Descartes, Kant, Hegel, Marx, Zubiri, Ortega...
Diante de Karl Marx, en Treveris
Acadar a participación tanto dos expoñentes como dos profesores que participabamos era unha tarefa difícil, que esixía moita dedicación a Manolo Regueiro, que coa súa laboriosidade, competencia, paciencia e humor que nunca lle faltaba, lograba levar con éxito.
Pensamos hoxe na necesidade do reciclaxe do profesorado. Manolo Regueiro anticipouse e soubo ver esta necesidade e poñer en práctica un instrumento para axudar a resolvela no eido da filosofía.
A miña amistade con Regueiro, ao que non coñecía antes do meu traslado a Lugo, naceu a través deste seminario permanente, e foi crecendo dadas as nosas afinidades profesionais e polas vivencias no que el chama “o noso seminario de Santiago”.
Non vou falar da súa loita pola lingua e cultura galegas desde a súa experiencia lingüística infantil ata o seu posto de Director Xeral de Política Lingüística. O “bilingüismo harmónico” é (segundo penso) unha solución moi sensata ao problema de loita entre linguas. Outros falarán largamente do tema. Non quero non obstante deixar no tinteiro o emotivo testemuño -xa moi enfermo- dos textos para recordar aspectos do galeguismo de Filgueira Valverde e -xa en cadeira de rodas- a homenaxe a Antonio Fraguas.
Volvendo ao lado filosófico, preocupouse por dispoñer de materiais didácticos para o ensino en lingua galega da filosofía nas nosas aulas. Desta preocupación xurdía a creación do equipo que redactou os primeiros libros de texto para a asignatura de filosofía en lingua galega: o primeiro “ Introducción á Filosofía” (Galaxia, 1979), o segundo foi unha “Historia da Filosofía” (Galaxia, 1980); estes libros pioneiros e outros posteriores de outros equipos consolidaron o ensino da filosofía en lingua galega.
Co cambio de século (2000) volveu Regueiro o ensino no Instituto Ánxel Fole de Lugo.
A presenza de novas materias no programa de estudios: “Ética” (4º de ESO), “Ética e Filosofía do Dereito” (optativa 1º BAC) e “Introdución á Socioloxía e ás Ciencias Políticas” (2º de BAC), levárono a traballar en Internet cos propios alumnos e froito deses traballos colgou na rede tres publicacións: (1) “19 mozos/as de bacharelato estudan a Constitución de 1978”, (2) “O Estatuto de Autonomía de Galicia. Cumio dunha historia” e (3) “A carta de dereitos fundamentais da Unión Europea”.
Para o estudo da Ética en cuarto da ESO publicou o libro de texto “Maneiras éticas e contexto” (Galinova, 2008). Tamén publicou para a materia de “Educación para a Cidadanía” o libro “Levantar a convivencia” (Galinova, 2007).
Son moitas as cousas que coa súa laboriosidade e competencia fixo para o ensino en lingua galega, e dunha maneira específica para o ensino en galego da filosofía.
